Es isch wieder so wit und üses letschte Turnfescht stoht vor dr Tür. Am 27. Juni am
8.30 Uhr träffe mir üs im Schueuhuus z’Subige. Gmeinsam radle mir mit em Velo, bi
wunderschönem Wätter, uf Biberist a die kantonali Meisterschaft.
Während desse isch d‘Jugend scho fliessig z‘Biberist am iturne!
Wo mir aui fit und munter ufem Festgländ acho si, isch es scho gli los gange. D‘Jugend
macht am 9.24 Uhr dr Afang mit dr Grätkombination und erturnet sech d’Note 7.58
und landet drmit ufem 6. Rang. Am 11.08 Uhr isch de scho s‘Chliifäud vo der Jugend a
d’Reihe cho, und isch mit dr Note 8.67 ufem 3. Podestplatz glandet. Bravo, mir si stouz uf
üsi Jugend und wünsche ihne no mängisch so ne super Erfoug.
Nach däm sech d‘Jugend ihre Fürobe redlich verdient het, hei sech Turner vom
Grossfäud scho müesse parat mache und si fliessig am iturne. Am 11.56 Uhr hätte
si söue Starte, aber leider hei Biberister es Problem mit dr Musigalag gha und Musig isch
immer wieder neu gstartet worde. D’Närve vo de Grossfäudturner si am Aschlag gsi.
Trotz dere Panne hei sie e super Vorfüehrig zeigt und chömme mit dr Note 9.08 i Finau.
D’Freud isch natürlech riesig.
E Stung spöter zeige d‘Froue ihres Team-Aerobic Programm und erkämpfe sich mit dr
Note 8.725 dr 9. Platz.
Nach em Mittag geits de witer. Am 13.56 Uhr isch d’Gymnastik Bühne a d’Reihe cho. Mit
dr Note 9.42 hei ou sie mit grosser Freud dr Finau erreicht.
Em haubi drü isch es de so wit, mit grosser Zueschouerzahl zeigt d’Männerriege ihres
Programm. Es isch immer wieder e grossi Freud ihne zuezluege. Ou sie hei mit em 3.
Platz und dr Note 8.36 chönne priliere.
Am Nomittag hets de vo de Subiger dr erschti Kantonaumeischter
gäh. D’Frauenpower hei aues gäh und mit dr Note 9.29 hei sie e grossi Leischtig zeigt.
Sie dörfe stouz si uf ihre 1. Platz!!!
Ändlech cha ou z’Chliifäud zeige was sie chöi. Churz nach de haube viere hei 15 Turner
mit ihrere guet gwäute Musig, em Publikum e unterhautsami Gymnastik zeigt. Mit dr
Note 9.22 hei ou si sech für e Finau qualifiziert.
Doch dermit isch noni Schluss. Nume D‘Grätkombi het ihres Chönne noni dörfe zeige.
16.36 träffe mir üs bim rote Platz wo Grätler ihres Programm nach emne lute „Hopp
Subige“ starte. Mit der Note 8.56 hei si dr 10. Rang erreicht.
Bevor das es los geit mit de spannende Finauvorfüehrige, heize d‘Leiter de Turner
nomou heftig i, damit ou aui wieder wach wärde.
Vo üsne drü Finalischte isch zersch d‘Gymnastik Bühne, nächer z‘Chliifäud und zum
Schluss no s‘ Grossfäud dra cho.
Nach em obligatorische erste Bier hei mir ändlich chönne go Znacht ässe. Während däm
mir s Rize Casimir gniesse, präsentiere i der Haue d‘Gymnaestrada-
Teilnähmerihres spannende Programm. Mir wünsche ihne im Juli z‘Helsinki vüu Erfoug
und guets Glinge!
Mit ere haubstündige verspötig fot am Zähni die lang ersehnti Rangverkündigung a. Es
isch bis zum Schluss spannend blibe. D‘Gymnastik Bühne erturnt der 2. Platz mit em ne
9.36. S‘Chliifäud het sich zur Vorrundi um ne Platz verbesseret und isch äbefaus 2. mit
der Note 9.42. Mit der Note 9.10 het sich s Grossfäud im Finau chönne steigere und
wärde Kantonaumeister. Yeahhhhhhhh…….. so ne Freud cha me fasch net überbiete.
Mit em DJ Gonzo löh mir dä erfougrichi Tag loh usklinge und fahre, voller Stouz und spot
ihr Nacht, mit üsne wohlverdiente Pokäu hei zue, Richtig Subige.
Sandra Curiger und Sonja Moser