Wie jedes Johr isch Besammlig im Chrütz zSubige. Es bar hei no es Gipfeli odr Kafi idr Hang. Und wie jedes
Johr wird über sgliche diskutiert. Het öper scho öpis ghört vom Migu? Ischer äch scho uf? Het ihm scho
öper aglüte? Ig ha ou scho s Natel zückt, aber es isch jo ersch 53 do muessme noni närvösele. Doch dasmou
hei mir ihm aui unrächt do, üse Organisator isch pünktlich ufd Minute vor Ort gsi. Acho idr Länk simer üs
nach dere Fahrt churz im Gade go sterche, dasmou sogar ohni Parkbuess. Nachem umlade und parkiere
ischs de äntlich los gange. Die Einte si diräkt ufe Lift und Angeri hei zur Ufwermig mitemne Icherschwung
gstartet. So richtig nach Winter hets nümme us gseh. E wisse Streife dürne grüeni Landschaft. Aber d Sunne
het gstrahlet, d Pischde si guet präpariert gsi und bis churz nachem Mittag eigentlich völlig ok zum fahre. S
Holzskirenne wo grad statt gfunge het, schint so spannend zgsi si, dass gwüssi gar nüm rächt vodr Terasse
zlocke si gsi. Am spötere Nomi hei mir üs nomou aui idr Walleg- Stube troffe und die letschde Sunnestrahle
gnosse. Mir hei gad wöue zahle, die erschte si scho abgloffe richtig Huus. Plötzlech chunnt e Gruppe
dPischde zdürab und hockt zu üs a Tisch. Es si die Holzskifahrer gsi. Eine het es Örgeli drbi gha und het de
ou grad afo spile. Nid lang ischs gange und plötzlich si mir mitz ire Chöubi inne gsi. Es isch gsunge worde
und ou s Tanzbei heimer gschwunge. Richtig luschdig und zfride. Dr Yannis het sogar e Schuelig uf dene
Holzski übercho und sich de ou grad zur Verfüegig gstellt, nöchschd Johr a däm Renne zstarte. Dr Hanspeter
Schläppi het das Johr das Renne gwunne. Klar ischs nid lang gange het üse Gian Schläppi und är es
Gsprächsthema zäme gfunge. Wo de äntlich aui im Huus si gsi, hets de ou scho Znacht gä. Feini
Älplermagrone wie immer. Dr Obe isch gmüetlich und zfride gsi, es het vöu zdiskutiere gä und a jedem Tisch
isch irgend es Spili gspöut worde. Am Morge isch gli mou klar gsi dases äuä nüt me wird mit Skifahre.
Wägem starche Wind si fasch aui Lifte zue blibe. Nachemne gmüetlech Zmorge hei mir de üsi Sache zäme
packt, s Huus ufgrumt und putzt. Us Alternativprogramm si mir de ufem Heiwäg no zäme go Zmittag ässe is
Hans im Glück in Muri. Zrugg in Subige ischs de das ou schowidr gsi. Es tolls Weekend mit kule Lüt und
super Stimmig. Merci aune wo drbi si gsi.
Tony Sury